Үхэхийн өмнө ч гэсэн...

Үхэхийн өмнө ч гэсэн ийм мэдрэмж төрөх үү

Үнсүүлээд үгүйрчихсэн мэт өр эмтлэм байх уу

Нүдийг чинь, уруулыг чинь өөрөөсөө харж

Нүүр, сэтгэлээ үзэн ядаж, халуун шунагаар тарчлах уу

Ахиад би ингэж хэдэн жил амьд явах вэ

Амьдрах гэдэг үнэндээ чиний дотор хоригдох мэт...

Ахиад би ингэж хэр удаан тэвчих вэ

Амаа ганц ч ангайлгүй чамайг дуудан хашхирч...

Хэр удаан гараа сунгавал чи намайг татах вэ

Хэрхэн энд ирснийг нулимс минь илчилнэ

Хэр удаан би ингэж үлээгдсэн бөмбөлөг шиг

Хага үсэрчихэлгүй чамайг хүлээж чадах вэ

Хэлж чадашгүй хараал шид мэт

Хэлж барамгүй худал хоосон мэт

Хайрт минь

Ханаж эгээршгүй минь

Үхэхийн өмнө ч гэсэн ийм л мэдрэмж төрөх үү

Үхэж байхдаа хүртэл ийм жаргалтай амьдрах уу...